ishq men ho ke mubtila dil ne kamal kar diya
yuun hi si ek shakl ko zohra jamal kar diya
ham ko tumhari bazm se uThne ka kuchh qalaq nahin
jaisa ḳhayal ho saka vaisa ḳhayal kar diya
sail-e-ravan-e-umr ke aage Thahar saka na kuchh
vaqt ne mehr-e-husn ko ru-ba-zaval kar diya
ek sam-e-azab sa phail gaya vajud men
roz-o-shab-e-firaq ne jiina muhal kar diya
meri zaban-e-ḳhushk par ret ka za.iqa sa hai
mausam-e-bar-shigal ne kaisa ye haal kar diya
dhund men kho ke rah ga.iin suraten mehr-o-mah si
vaqt ki gard ne unhen ḳhvab-o-ḳhayal kar diya
Leave a Reply