ḳhvab aram nahin ḳhvab pareshani hai
mere bistar men aziyyat ki faravani hai
mujh ko to vo bhi hai ma.alum jo ma.alum nahin
ye samaj-bujh nahin hai miri nadani hai
kuchh use sochne deta hi nahin apne siva
mera mahbub to mere liye zindani hai
hai musibat men giraftar musibat meri
jo bhi mushkil hai vo mere liye asani hai
mauja-e-mai hai bahut mere sukun par betab
zabt-e-girya se mire jaam men tughyani hai
main gunahgar-e-tamanna huun mujhe qatl karo
dil to haara hai magar haar nahin maani hai
Leave a Reply