Jabbar Wasif
jo nabatat-o-jamadat pe shak karte hain
ai ḳhuda tere kamalat pe shak karte hain
vo jo kahte hain dhamake se jahan ḳhalq hua
dar-haqiqat vo samavat pe shak karte hain
main bhi bachpan men tafakkur pe yaqin rakhta tha
mere bachche bhi rivayat pe shak karte hain
main isi shahr men aansu liye phirta huun jahan
peḌ chiḌiyon ki munajat pe shak karte hain
apne hisse men vo be-faiz sadi hai jis men
log valiyon ki karamat pe shak karte hain
is liye ham pe guzarti hai qayamat har din
ham qayamat ki alamat pe shak karte hain
aap ke khet men ugti hai sunahri gandum
aap kyon us ki inayat pe shak karte hain
jin ko muusa ka pata hai na ḳhabar tuur ki hai
aise bad-baḳht bhi taurat pe shak karte hain
ishq ki ain ka to dasht men madfan hi nahin
ashiqan yunhi ḳharabat pe shak karte hain
aap jharnon ki tilavat ko nahin sun sakte
aap fitrat ke isharat pe shak karte hain
sirf sha.ir hi nahin huun main musalman bhi huun
aap kyon meri ibadat pe shak karte hain
aap ko chahiye suqrat ke baare men paḌhen
aap ‘vasif’ ke ḳhayalat pe shak karte hain
Leave a Reply