pahunche to mere gham ki sada tere shahar men
ro.egi tere saath ghaTa tere shahar men
aḳhir miri duaon men tasir kyon nahin
kya so gaya hai mera ḳhuda tere shahar men
ik fasla hai jab ki tire mere darmiyan
main kya karungi aa ke bata tere shahar men
barf oḌh kar pahaḌon se utregi DhunDne
tujh ko udaas udaas hava tere shahar men
tujh se mili to TuuT gaya umr bhar ka ḳhvab
ab main huun zindagi se juda tere shahar men
dharti pe jab bhi Tapkega ‘nasrin’ ka lahu
hogi lahu lahu si faza tere shahar men
Leave a Reply