ahmad-adil

Ye Diya Khun Se Jala Phir Bhi Jala Hai To Sahi

ye diya khuun se jala phir bhi jala hai to sahi

laakh rasman hi mila mujh se mila hai to sahi

an-kahi baat samajh lo to badi baat hai ye

meri khamosh navai men sada hai to sahi

Dagmagata mujhe dekhe to sahara de koi

ye jo laghzish hai to laghzish ka maza hai to sahi

bhigi ankhen ye batati hain ki sun kar mira haal

kuchh na kuchh tujh ko bhi ehsas hua hai to sahi

kahen maghrur ko badmast magar sach ye hai

inkisari men bhi apna hi nasha hai to sahi

zindagi bhar miri hasti men racha ho jaise

tujh ko dekha nahin mahsus kiya hai to sahi

kavish-e-zist hai kya apni hi hasti ki talash

khud ko pa lena hi insan ka sila hai to sahi

hai jo azurdagi us ki dam-e-rukhsat ‘adil’

tujh ko andaza-e-tajdid-e-vafa hai to sahi

More Poems

Leave a Comment