khud ko kyuun jism ka zindani karen
fikr ko takht-e-sulaimani karen
der tak baith ke sochen khud ko
aaj phir ghar men bayabani karen
apne kamre men sajaen afaq
jalsa-e-be-sar-o-samani karen
umr bhar sher kahen khuun thuken
muntakhab rasta nuqsani karen
khud ke sar mol len iz.har ka qarz
dusron ke liye asani karen
sher ke lab pe khamoshi likkhen
harf-e-na-gufta ko la-fani karen
kimiya-kari hai fan apna ‘saz’
aag ko baithe hue paani karen
Leave a Reply