imkan khule dar ka har aan bahut rakkha
is gumbad-e-be-dar ne hairan bahut rakkha
abad kiya dil ko hangama-e-hasrat se
sahra-e-tag-o-dau ko viran bahut rakkha
ik mauj-e-fana thi jo roke na ruki aḳhir
divar bahut khinchi darban bahut rakkha
taron men chamak rakkhi phulon men mahak rakkhi
aur ḳhaak ke putle men imkan bahut rakkha
jalti hui batti se gul phuuT nikalte hain
mushkil se bhi mushkil ko asan bahut rakkha
kuchh hai jo nahin hai bas vo kya hai ḳhuda jaane
yuun apni samajh se ham saman bahut rakkha
mashkuk hai ab har shai ankhon men ‘suhail’ apni
ham ne but-e-kafir par iman bahut rakkha
Leave a Reply