suni hai chaap bahut vaqt ke guzarne ki
magar ye zaḳhm ki hasrat hai jis ke bharne ki
hamare sar pe to ye asman TuuT paḌa
ghaḌi jab aai sitaron se maang bharne ki
girah men daam to rakhte hain zahr khane ko
ye aur baat ki fursat nahin hai marne ki
bahut malal hai tujh ko na dekh paane ka
bahut ḳhushi hai tiri raah se guzarne ki
batao tum se kahan rabta kiya jaae
kabhi jo tum se zarurat ho baat karne ki
Leave a Reply