yaad nahin kya kya dekha tha saare manzar bhuul ga.e
us ki galiyon se jab lauTe apna bhi ghar bhuul ga.e
ḳhuub ga.e pardes ke apne divar-o-dar bhuul ga.e
shish-mahal ne aisa ghera miTTi ke ghar bhuul ga.e
tujh ko bhi jab apni qasmen apne va.ade yaad nahin
ham bhi apne ḳhvab tiri ankhon men rakh kar bhuul ga.e
mujh ko jinhonne qatl kiya hai koi unhen batla.e ‘nazir’
meri laash ke pahlu men vo apna ḳhanjar bhuul ga.e
Leave a Reply