tum kuchh bhi karo hosh men aane ke nahin ham
hain ishq gharane ke zamane ke nahin ham
ham aur mohabbat ke siva kuchh nahin karte
vo ruuTh gaya hai to manane ke nahin ham
dariya hai mohabbat to mile jism ka maidan
ik jism pyale men samane ke nahin ham
ham par bhi kabhi apni halakat ki nazar Daal
sach jaan ki jaan apni bachane ke nahin ham
kitna hi kare shor yahan aa ke zamana
tujh par se magar dhyan haTane ke nahin ham
ye jism faqat ek taraf ka hai musafir
ja kar phir usi jism men aane ke nahin ham
paas aao ki ham kha to nahin ja.enge tum ko
bas daant dikhane ke hain khane ke nahin ham
‘ehsas’-miyan piir hain murshid hain hamare
ab uTh ke yahan se kahin jaane ke nahin ham
Leave a Reply