koi parda miyan-e-ishq haa.il ho nahin sakta
ye had hai to bhi ab madd-e-muqabil ho nahin sakta
tira ahd-e-mohabbat TuuT kar ahd-e-mohabbat hai
magar dil TuuT jaata hai to phir dil ho nahin sakta
mohabbat men parastish ka maqam uncha sahi lekin
ye gham insan ki fitrat men shamil ho nahin sakta
mire azm-e-safar men ye tira husn-e-sukun-afza
charagh-e-rah ban sakta hai manzil ho nahin sakta
giraya hai nazar ki us bulandi se mujhe tu ne
main ab apni nigahon ke bhi qabil ho nahin sakta
Leave a Reply