us ne kiya hijab mire dekhne ke ba.ad
us ko mila savab mire dekhne ke ba.ad
surat pe char-chand lage the janab ki
ye bhi tha inqalab mire dekhne ke ba.ad
meri nazar se Daliyan chhu kar hari huiin
khilne lage gulab mire dekhne ke ba.ad
itna main sher-fahm nahin huun magar yahan
chhapte hain intiḳhab mire dekhne ke ba.ad
khulta hi ja raha hai kisi ruḳh ke ru-ba-ru
sharm-o-haya ka baab mire dekhne ke ba.ad
pahle nazar uTha ke mujhe dekhte bhi the
lekin ye ijtinab mire dekhne ke ba.ad
meri nazar men dosto shiddat bala ki thi
TuuTa paḌa tha ḳhvab mire dekhne ke ba.ad
Leave a Reply