aziz-bano-darab-wafa

Zara Mushkil Se Samjhenge Hamare Tarjuman Hum Ko

zara mushkil se samjhenge hamare tarjuman ham ko

abhi dohra rahi hai khud hamari dastan ham ko

kisi ko kya khabar patthar ke pairon par khade hain ham

sadaon par sadaen de rahe hain karvan ham ko

ham aise surma hain lad ke jab halat se palte

to badh ke zindagi ne pesh kiin baisakhiyan ham ko

sambhala hosh jab ham ne to kuchh mukhlis azizon ne

kai chehre diye aur ek patthar ki zaban ham ko

utha hai shor khud apne hi andar se magar akasr

dahal ke band kar lena padi hain khidkiyan ham ko

ham apne jism men bikhre hue hain ret ki surat

sametengi kahan tak zindagi ki mutthiyan ham ko

bichhad ke bhiid men khud se havason ka vo aalam tha

ki munh khole hue takti rahin parchhaiyan ham ko

More Poems

Leave a Comment