Shakeel Azmi
zinda rahna hai to sanson ka ziyan aur sahi
raushni ke liye thoḌa sa dhuan aur sahi
sub.h ki shart pe manzur hain raten ham ko
phuul khilte hon to kuchh roz ḳhizan aur sahi
ḳhvab tabir ka hissa hai to so kar dekhen
sach ke idrak men ik shahr-e-guman aur sahi
vo barush aur main rota huun qalam se apne
dard to ek hain donon ke zaban aur sahi
kaT ga.e apni hi miTTi se to jaldi kya hai
ab zamin aur sahi aur makan aur sahi
Leave a Reply