Khurshid Talab
na shahr men na kisi dasht-e-hu men ḳhaak hue
hamare ḳhvab hamare lahu men ḳhaak hue
kisi ke haath laga kab vo mahtab-badan
ka.i jiyale vahin justuju men ḳhaak hue
dhuan sa uThta hai dil se jo sochta huun kabhi
vo kaun the jo miri aarzu men ḳhaak hue
the kitne giit jo avaz ko taraste rahe
hazar raag rag-e-ḳhush-gulu men ḳhaak hue
ab is se achchha-bhala iḳhtitam kya hota
uThe the main se magar ja ke tu men ḳhaak hue
Leave a Reply