mizaj-e-mustaqil dena shu.ur-e-mo.atabar dena
jhuka paa.e na jis ko vaqt ka tufan vo sar dena
mujhe umr-e-ḳhizar dena ki umr-e-muḳhtasar dena
mire afkar lekin zinda-e-javed kar dena
jo uTThe samt-e-mazi vo nazar mera nahin hasil
pas-e-divar-e-mustaqbil jo dekhe vo nazar dena
mujahid jang ke maidan ko jaa.e jis tarah ghar se
ye manzar zehn men rakh kar mujhe izn-e-safar dena
agar is razm-gah-e-dahr men jiina hi hai mujh ko
to phir in yurishon men zinda rahne ka hunar dena
siva ho jaa.e jis se azmat-e-dida-vari ‘gauhar’
nazar dena to yarab phir mujhe aisi nazar dena
Leave a Reply