apne bojh se TuuT raha huun
main bhi kanch ka ik TukḌa huun
koi kahani yaad nahin hai
raddi kaghaz bech chuka huun
ziist ne apne par phaila.e
ret ke sahraon men khaḌa huun
apni baat kahun to kyon kar
un ki baton men uljha huun
sab miTTi ke saudagar hain
jin ke bhi hathon men bika huun
mujh se tark-e-ta.alluq kar lo
main andar se TuuT chuka huun
tum hi becho tum hi ḳharido
sud-o-ziyan se la-parva huun
laakh sanvaro laakh bigaḌo
vaisa rahunga main jaisa huun
nuqta ek huun ‘iraj’ lekin
samton men samton men baTa huun
Leave a Reply