Apne Bojh Se TuT Raha Hun

apne bojh se TuuT rahā huuñ

maiñ bhī kāñch kā ik TukḌā huuñ

koī kahānī yaad nahīñ hai

raddī kāġhaz bech chukā huuñ

ziist ne apne par phailā.e

ret ke sahrāoñ meñ khaḌā huuñ

apnī baat kahūñ to kyoñ kar

un kī bātoñ meñ uljhā huuñ

sab miTTī ke saudāgar haiñ

jin ke bhī hāthoñ meñ bikā huuñ

mujh se tark-e-ta.alluq kar lo

maiñ andar se TuuT chukā huuñ

tum hī becho tum hī ḳharīdo

sūd-o-ziyāñ se lā-parvā huuñ

laakh sañvāro laakh bigāḌo

vaisā rahūñgā maiñ jaisā huuñ

nuqta ek huuñ ‘īraj’ lekin

samtoñ meñ samtoñ meñ baTā huuñ

Leave a Comment