husn-e-tadbir bhi tha ḳhubi-e-taqdir bhi tha
tu ne dekha hi nahin main tiri tasvir bhi tha
umr-bhar ahl-e-mohabbat ko pata hi na chala
vaqt us zaḳhm-e-jigar ke liye zanjir bhi tha
kya hua ashk ki jo zinat-e-mizhgan ho kar
hasil-e-dard bhi tha dard ki tafsir bhi tha
thi zaban band tiri bazm men lekin kuchh yuun
dil dhaḌakta tha ki ik alam-e-taqrir bhi tha
fikr farmate jo arbab-e-hunar ai ‘nashtar’
aap ke daur men ‘ghalib’ hi nahin ‘mir’ bhi tha
Leave a Reply