gale pe ik ḳhanjar ab-dar kis ka hai
ye roz roz miri jaan pe vaar kis ka hai
hai kaun sazish-e-gard-o-ghubar ke pichhe
pas-e-sumum-e-junun regzar kis ka hai
dhamak-zada hain ḳhalaon men bastiyan kis ki
shikasta sar pe makan intishar kis ka hai
chamakte rang khile naqsh a.ina chehre
to aaj naqsh-e-nazar par ye baar kis ka hai
sarab-o-dasht zaman-o-makan sab yaksan
hamen bhi dahr men ab e’tibar kis ka hai
hai kaun dil ki ada-e-talab se na-vaqif
baghair naghma larazta hai taar kis ka hai
koi nahin hai agar daftar-e-taḳhatub men
to phir ye harf ye qaul-o-qarar kis ka hai
palaT ke aa.i hai maqtal men zindagi ‘rahat’
faqih-e-shahr ko ab intizar kis ka hai
Leave a Reply