Hasinon Ke Sitam Ko Mehrbani Kaun Kahta Hai

hasinon ke sitam ko mehrbani kaun kahta hai

adavat ko mohabbat ki nishani kaun kahta hai

ye hai ik vaqa.i tafsil meri ap-biti ki

bayan-e-dard-e-dil ko ik kahani kaun kahta hai

yahan har-dam na.e jalve yahan har-dam na.e manzar

ye duniya hai na.i is ko purani kaun kahta hai

tujhe jis ka nasha har-dam liye phirta hai jannat men

bata ai shaiḳh us kausar ko paani kaun kahta hai

tariqa ye bhi hai ik imtihan-e-jazba-e-dil ka

tumhari be-ruḳhi ko bad-gumani kaun kahta hai

bala hai qahr hai aafat hai fitna hai qayamat ka

hasinon ki javani ko javani kaun kahta hai

fana ho kar bhi hasil hai vahi rang-e-baqa us ka

hamari hasti-e-fani ko faani kaun kahta hai

hazaron ranj is men ‘arsh’ lakhon kulfaten is men

mohabbat ko surud-e-zindagani kaun kahta hai