Kabhi Junun to Kabhi Aagahi Ki Qaid Mein Hun

Krishn Bihari Noor

kabhi junun to kabhi agahi ki qaid men huun

main apne zehn ki avargi ki qaid men huun

sharab mere labon ko taras rahi hogi

main rind to huun magar tishnagi ki qaid men huun

na koi samt na jaada na manzil-e-maqsud

yugon yugon se yunhi be-ruḳhi ki qaid men huun

kisi ke ruḳh se jo parda uTha diya main ne

saza ye paa.i ki divangi ki qaid men huun

ye kis ḳhata ki saza men hain dohri zanjiren

giraft maut ki hai zindagi ki qaid men huun

na jaane kitni naqaben ulaTta jaata huun

janm janm se main bechargi ki qaid men huun

yahan to parda-e-simin pe chal rahi hai film

main jis jagah huun vahan raushni ki qaid men huun

jahan main qaid se chhuTun vahin pe mil jaana

abhi na milna abhi zindagi ki qaid men huun

gharaz nasib men likkhi rahi asiri hi

kisi ki qaid se chhuTa kisi ki qaid men huun

gunah ye hai ki kyuun apna naam rakha ‘nur’

vo din aur aaj ka din tirgi ki qaid men huun