kaam duniya men bahut karna hai
qabl marne ke hamen marna hai
aa.iye naza.a ka hangam hai ab
mashvara aap se kuchh karna hai
dil ne ye kah ke kahin chhoḌa saath
ham ko kuchh kaam yahan karna hai
qatl karne men takalluf na karo
aḳhir ik roz hamen marna hai
tum se ik roz karenge taqrir
apni baton men asar bharna hai
tum ko dikhla.enge dil ki tasvir
ja-ba-ja rang abhi bharna hai
rok lo girya-e-ḳhunin ko ‘aziz’
dil ka nasur abhi bharna hai
Leave a Reply