raqs karti hai faza vajd men jaam aaya hai
phir koi le ke baharon ka payam aaya hai
bada-ḳhvaran-e-fana baḌh ke qadam lo us ke
le ke saghar men jo sahba-e-davam aaya hai
main ne sikha hai zamane se mohabbat karna
tera paigham-e-mohabbat mire kaam aaya hai
rahbar-e-jada-e-haq nur-e-ḳhuda haadi den
le ke ḳhaliq ka zamane men payam aaya hai
teri manzil hai buland itni ki har sham-o-sahar
chand-suraj se tire dar ko salam aaya hai
ho gaya teri mohabbat men giraftar to phir
ta.er-e-ruh bhala kab tah-e-dam aaya hai
ḳhud-ba-ḳhud jhuk ga.i peshani-e-arbab-e-ḳhudi
ishq ki raah men aisa bhi maqam aaya hai
asiyo shukr ki ja hai ki ba-faiz-e-ḳhaliq
ham gunahgaron ki baḳhshish ka payam aaya hai
haram-o-dair ke logon ki ḳhushi kya kahna
banda-e-ḳhaliq-o-dil-dada-e-ram aaya hai
tishna-kaman-e-nazara ko ye muzhda de do
be-naqab aaj koi phir sar-e-bam aaya hai
ho mubarak tumhen rindo ki ba-ta.id-e-ḳhuda
koi chhalkata hua shisha-o-jam aaya hai
jab kabhi gardish-e-dauran ne sataya hai bahut
tere rindon ki zaban par tira naam aaya hai
ahl-e-maghrib ko pila kar mai-e-irfan ‘darshan’
phir se mashriq ki taraf arsh-maqam aaya hai
Leave a Reply