phir sar pe shaam aa ga.i main raste men huun
ik ajnabi saḌak hai kisi hadse men huun
ik gard-bad hai mujhe hadd-e-nigah tak
tanha nahin huun dhul-bhare qafile men huun
tanha.iyon ne phir tira chehra pahan liya
tere baghair bhi main tire da.ere men huun
tu ne to mujh ko aks-e-muqayyad samajh liya
thoḌi si der aur tire aa.ine men huun
mera bhi zikr tha tire dil ki kitab men
qirtas par nahin huun magar hashiye men huun
sau saal mujh pe biite hain suraj bujhe hue
sau saal jaisi raat se main ratjage men huun
patthar ki murti men hai sadiyon ka intizar
main bhi asir-e-jism huun aur faisle men huun
phir be-ghari ka ḳhauf havaon men ghul gaya
saat asman tere hain main ghonsle men huun
Leave a Reply