kal raat mira beta mire ghar
chehre pe mundhe khaki kapda
banduq uthae aa pahuncha
nau-umri ki surkhi se rachi us ki ankhen
main jaan gai
aur bachpan ke sandal se manDha us ka chehra
pahchan gai
vo aaya tha khud apne ghar
ghar ki chizen le jaane ko
an-kahi kahi manvane ko
baton men duudh ki khushbu thi
jo kuchh bhi saint ke rakkha tha
main saari chizen le aai
ik laal-e-badakhshan ki chidiya
sone ka haath chhota sa
chandi ki ik nannhi takhti
resham ki phuul bhari topi
atlas ka naam likha juzdan
juzdan men lipta ik quran
par vo kaisa divana tha
kuchh chhod gaya kuchh tod gaya
aur le bhi gaya hai vo to kya
lohe ki bad-surat gaadi
petrol ki bu bhi aaegi
jis ke pahiye bhi rabar ke hain
jo baat nahin kar paegi
bachcha phir akhir bachcha hai