kisi ke vada-e-farda men gum hai intizar ab bhi
ḳhuda jaane hai kyuun ik be-vafa par e.atibar ab bhi
kabhi ki thi tamanna lala-o-gul ki nigahon ne
rulati hai lahu ke rang men fasl-e-bahar ab bhi
tire qaul-o-amal men farq milta hai mujhe zahid
zaban par lafz-e-tauba hai nigah men hai ḳhumar ab bhi
ḳhizan ke ba.ad is ummid par gulshan nahin chhoḌa
ye mumkin hai ki chal jaa.e hava-e-ḳhush-gavar ab bhi
hamare dil ko jis ne shams’ virani inayat ki
usi ko yaad karti hai nigah-e-be-qarar ab bhi
Leave a Reply