Ravish Siddiqi
rabt-e-pinhan ki sadaqat hai na milna tera
tere milne hi ki surat hai na milna tera
kyuun mira shauq-e-faravan hai ba-har lamha fuzun
kya koi raz-e-mashiyyat hai na milna tera
lala-o-gul mah-o-anjum se gila hai kya kya
aur maqsud-e-shikayat hai na milna tera
kisi surat kisi unvan se talafi na hui
kis qadar talḳh haqiqat hai na milna tera
zindagi ne tire milne ka bahana samjha
varna dar-asl qayamat hai na milna tera
phir bhi tere liye avara-e-ghurbat hai ‘ravish’
garche shayan-e-mohabbat hai na milna tera
Leave a Reply