Ishq to Sari Umr Ka Ek Pesha Nikla

ishq to saarī umr kā ik pesha niklā

ham ne kyā sochā thā yaaro kyā niklā

dil kā patthar pighle to kyā niklegā

patthar kā dil pighlā to dariyā niklā

bhaag rahā hai dariyā bhī sāgar kī taraf

pyaas bujhāne vaalā ḳhud pyāsā niklā

sub.h savere thī kirnoñ kī bazm sajī

shaam ko ghar se tanhā ik saaya niklā

itnī umr meñ apne ma.anī kuchh na mile

dil meñ sūrat āñkhoñ meñ sapnā niklā

dil ke safar meñ lahū kā dariyā paar kiyā

us ke aage sahrā meñ sahrā niklā

le ke faqīrī aas lagā.ī duniyā se

‘bāqar’ pyāre tū bhī sag-e-duniyā niklā

Leave a Comment