kisi ki zulf-e-shikan-dar-shikan ki baat hui
hamare vaste dar-o-rasan ki baat hui
kabhi dhanak pe kabhi chandni pe haath paḌa
jo tere jism ki tere badan ki baat hui
ik aah dil se uThi aur labon pe TuuT ga.i
kabhi kahin jo tiri anjuman ki baat hui
zahe-nasib ki tera bhi naam aaya hai
jahan jahan mire divana-pan ki baat hui
hazar rang nigahon men ghul ga.e ‘shahid’
agar kahin kisi gul-pairahan ki baat hui
Leave a Reply