aaj kya haal hai yarab sar-e-mahfil mera
ki nikale liye jaata hai koi dil mera
soz-e-gham dekh na barbad ho hasil mera
dil ki tasvir hai har aina-e-dil mera
subh tak hijr men kya janiye kya hota hai
shaam hi se mire qaabu men nahin dil mera
mil gai ishq men iza-talabi se rahat
gham hai ab jaan miri dard hai ab dil mera
paaya jaata hai tiri shokhi-e-raftar ka rang
kaash pahlu men dhadakta hi rahe dil mera
haae us mard ki qismat jo hua dil ka sharik
haae us dil ka muqaddar jo bana dil mera
kuchh khatakta to hai pahlu men mire rah rah kar
ab khuda jaane tiri yaad hai ya dil mera
Leave a Reply