aankh se ḳhvab ka rishta nahin rahne deti
yaad us ki mujhe tanha nahin rahne deti
lazzat-e-dar-badari men baḌi vus.at hai ki ye
dar-o-divar ka jhagḌa nahin rahne deti
ghar ho ya raunaq-e-bazar kahin bhi ja.un
be-qarari to kisi ja nahin rahne deti
band kar luun to ajab naqsh nazar aate hain
aankh mahrum-e-tamasha nahin rahne deti
ḳhvahish-e-zar ki hava dil ke siyah-ḳhane men
ik diya hai jise jalta nahin rahne deti
Leave a Reply