Kis Ke Khoe Hue Ausan Chale Aate Hain

kis ke kho.e hue ausān chale aate haiñ

vo jo yuuñ be-sar-o-sāmān chale aate haiñ

ġhair ke milne kī tākīd hai har ḳhat meñ mujhe

kis qayāmat ke ye farmān chale aate haiñ

tum jo nāzuk ho to kyā aa nahīñ sakte dil meñ

aañkh kī raah bhī insān chale aate haiñ

ghar se bāhar nikal aayā na ho vo parda-nashīñ

log kyoñ chāk-garebān chale aate haiñ

rashk-e-dushman kabhī dil meñ hai ḳhayāl-e-ġham-dost

aaj mehmān pe mehmān chale aate haiñ

aap ġhurbat meñ na ghabrā.iye itnā ‘safdar’

dekhiye ġhaib se sāmān chale aate haiñ

Leave a Comment