Poet
kis ke kho.e hue ausan chale aate hain
vo jo yuun be-sar-o-saman chale aate hain
ghair ke milne ki takid hai har ḳhat men mujhe
kis qayamat ke ye farman chale aate hain
tum jo nazuk ho to kya aa nahin sakte dil men
aankh ki raah bhi insan chale aate hain
ghar se bahar nikal aaya na ho vo parda-nashin
log kyon chak-gareban chale aate hain
rashk-e-dushman kabhi dil men hai ḳhayal-e-gham-dost
aaj mehman pe mehman chale aate hain
aap ghurbat men na ghabra.iye itna ‘safdar’
dekhiye ghaib se saman chale aate hain
Leave a Reply