aal-e-ahmad-suroor

Zanjir Se Junun Ki Khalish Kam Na Ho Saki

zanjir se junun ki khalish kam na ho saki

bhadki agar ye aanch to maddham na ho saki

badle bahar-e-lala-o-gul ne hazar rang

lekin jamal-e-dost ka aalam na ho saki

kya kya ghubar uthae nazar ke fasad ne

insaniyat ki lau kabhi maddham na ho saki

ham laakh bad-maza hue jam-e-hayat se

jiine ki pyaas thi ki kabhi kam na ho saki

jo jhuk gai jabin tire naqsh-e-qadam ki samt

ta-zist phir vo aur kahin kham na ho saki

mujh se na puchh apni hi tegh-e-ada se puchh

kyuun teri chashm-e-lutf bhi marham na ho saki

kitne rumuz-e-shauq in ankhon men rah gae

jin se nigah-e-dost bhi mahram na ho saki

mauj-e-nasim apni baharen luta gai

lekin khizan ki muda-dili kam na ho saki

allah-re ishtiyaq nigah-e-umid ka

khoe houun ki yaad men pur-nam na ho saki

gul-kari-e-nazar ho ki rang-e-jamal-e-dost

kuchh baat thi ki ziist jahannam na ho saki

in ki jabin pe khair se ik rang aa gaya

meri vafa agarche musallam na ho saki

apne hi ghar ki khair manai tamam umr

ham se ‘surur’ fikr-e-do-alam na ho saki

More Poems

Leave a Comment