Bahut Qarib Hai Pat-jhaD Ki Rut Palak Na uTha

Nashtar Khaanqahi

bahut qarib hai pat-jhaḌ ki rut palak na uTha

zamin se aks uTha dhuup ki chamak na uTha

ghilaf-e-sang men lipTa hua hai shahr ka shahr

chali hava to zamin se ghubar tak na uTha

qadam qadam pe ye Dar tha ki ghaat men hai koi

yahan to pa-e-tafakkur men thi jhijak na uTha

phir apna apna kafan le ke chal diye sab log

kisi se bar-e-gham-e-marg-e-mushtarak na uTha

main chob-e-gham tha ki pahron sulag sulag ke jala

kabhi jo sho.ala uTha bhi to yak-ba-yak na uTha

shigaf-e-sar ko vajud-e-hava-e-shor bahut

ye shahr-e-sang hai yaan tohmat-e-namak na uTha

bahut zamin se uThaya uThi na parchha.in

gira tha aks kuchh aisa ki aaj tak na uTha