avara avara ḳhushbu ham dono
jaane kis din honge yaksu ham donon
taaza taaza phulon ki rut kahti hai
kar len kuchh tafrih lab-e-ju ham donon
phir kya shai hai maan.e saath nibhane men
rakhte to hain yaksan ḳhushbu ham donon
main chalta huun dil par aql-o-hosh pe to
jis ka toḌ nahin vo jaadu ham donon
apni apni pahchanon ke shaida.i
tariki men uḌte jugnu ham donon
Takra.e to TuTenge miT ja.enge
apne aap pe rakkhen qaabu ham donon
rasmon ke bandhan se baazu khulte to
azadi se uḌte har-su ham donon
us men rah kar us se bachna mushkil hai
duniya navak afgan aahu ham donon
tasviron ka album laao dekhen to
kitne the ḳhush-qamat ḳhush-ru ham donon
Leave a Reply