paigham-e-shabab aa raha hai
shaḳhon pe gulab aa raha hai
jazbe ka parinda kyuun na taḌpe
rahon men sarab aa raha hai
hoshyar rahe ḳhirad ki mahfil
ik ḳhana-ḳharab aa raha hai
sarshar hain vaqt ke kaTore
jam-e-mai-e-nab aa raha hai
is tarah shafaq ko niind aa.i
ehsas ko ḳhvab aa raha hai
insan hai be-haya kuchh aisa
haivan ko hijab aa raha hai
taron ki nigah kyuun na chamke
chehre pe naqab aa raha hai
kora hai ye hashiya ḳhudi ka
hasti ka vo baab aa raha hai
ungli men ubhar rahi hai sozish
hathon men rubab aa raha hai
puchha jo saval asman se
dharti se javab aa raha hai
ghulta hai dimagh ai ‘karamat’
sar par jo azaab aa raha hai
Leave a Reply