ye jo saa.e sata rahe the mujhe
kis liye aazma rahe the mujhe
ḳhud hi manzar se haT ga.e ho tum
raste se haTa rahe the mujhe
apne andar jo jhank kar dekha
kitne hi dard kha rahe the mujhe
main gul-e-aks tha sabhi chehre
aa.ine men khila rahe the mujhe
koi naghma na giit huun phir bhi
vasvase gunguna rahe the mujhe
main andhere men tha magar kuchh log
raushni men bula rahe the mujhe
ho gaya main ‘fida’ haqiqat par
ḳhvab saare sata rahe the mujhe
Leave a Reply