Nasira Zuberi
nahin hai yuun ki use ham tamam bhuul ga.e
vo shakl yaad rahi us ka naam bhuul ga.e
vo bolti hui ankhen hamen rahin azbar
zaban-e-ḳhalq ke saare kalam bhuul ga.e
talash-e-tishna-labi men vo nashsha tha ki hamen
nasib men the jo labrez jaam bhuul ga.e
mila to sunte rahe dastan dushman ki
hamare dil men tha jo intiqam bhuul ga.e
kise samajhna hai rahzan to rahnuma kis ko
ye faisle ki ghaḌi men avaam bhuul ga.e
ye be-ḳhudi se bhi aage ki raah thi shayad
jise pukarne nikle vo naam bhuul ga.e
Leave a Reply