Kam-Zarf Ehtiyat Ki Manzil Se Aae Hain

Ali Jawwad Zaidi

kam-zarf ehtiyat ki manzil se aa.e hain

ham zindagi ke jada-e-mushkil se aa.e hain

girdab mahv-e-raqs hai tufan mahv-e-josh

kuchh log shauq-e-mauj men sahil se aa.e hain

ye vaz-e-zabt-e-shauq ki dil jal bujha magar

shikve zaban pe aaj bhi mushkil se aa.e hain

ankhon ka soz dil ki kasak to na.iin mili

maana ki aap bhi usi mahfil se aa.e hain

ye qashqa-e-ḳhulus hai zaḳhm-e-jabin nahin

har chand ham bhi kucha-e-qatil se aa.e hain

dil ka lahu nigah se Tapka hai bar-ha

ham rah-e-gham men aisi bhi manzil se aa.e hain

dil ik udaas sub.h nazar ik udaas shaam

kaise kahen ki dost ki mahfil se aa.e hain

chheḌa tha nok-e-ḳhar ne lekin guman hua

taaza payam parda-e-mahmil se aa.e hain

haan gaa.e ja mughanni-e-bazm-e-tarab ki aaj

naghme tiri zaban pe mire dil se aa.e hain