gham ki andheri raat ki jaane sahar na aa.e kyon
pahron jale kisi ka dil zaḳhm ubhar na aa.e kyon
apne para.e ho ga.e ghairon ne bhi kiya sitam
aise men dardmand dil dard se bhar na aa.e kyon
tera hi jab ḳhayal hai aThon pahar dimagh men
jagte sote har taraf tu hi nazar na aa.e kyon
tere bina ab ek pal mujh se raha na jaa.e hai
DhunDe tujhe miri nazar teri ḳhabar na aa.e kyon
husn-o-jamal dil-fareb us pe ye sadgi to dost
aql tiri adaon ke zer-e-asar na aa.e kyon
sehn-e-chaman men vaise to gul hain har ek rang ke
tere siva kisi pe bhi dil ye magar na aa.e kyon
ḳhud hi adavaton ka biij boya hai aap ne to phir
kiina nifaq-o-bughz ka us men samar na aa.e kyon
apne karam ki raushni us ne bikher di to ‘shad’
rang hamare baḳht ka bolo nikhar na aa.e kyon
Leave a Reply