Abdullah Javed
ashk dhalte nahin dekhe jaate
dil pighalte nahin dekhe jaate
phuul dushman ke hon ya apne hon
phuul jalte nahin dekhe jaate
titliyan haath bhi lag jaaen to
par masalte nahin dekhe jaate
jabr ki dhuup se tapti sadken
log chalte nahin dekhe jaate
khvab-dushman hain zamane vaale
khvab palte nahin dekhe jaate
dekh sakte hain badalta sab kuchh
dil badalte nahin dekhe jaate
karbala men rukh-e-asghar ki taraf
tiir chalte nahin dekhe jaate
Leave a Reply