dekhen a.ine ke manind sahen gham ki tarah
ham ki hain bazm-e-gul-o-lala men shabnam ki tarah
vaqt be-mehr hai is fursat-e-kamyab men tum
meri ankhon men raho ḳhvab-e-mujassam ki tarah
arsa-e-umr men kya kya na ruten aa.iin magar
koi Thahri na yahan dard ke mausam ki tarah
kis tarah us se kahun zaḳhm bhi hain us ki ata
haath jis ka mire siine pe hai marham ki tarah
main ne chaha tha ki ik jast men pahunchun lekin
raah men sang the albatta o taham ki tarah
tera ehsan hai ki shadab raha kunj-e-ḳhayal
dil-e-pur-ḳhun ki tarah dida-e-pur-nam ki tarah
us ki guftar ne chhoḌa na kahin ka ham ko
za.iqa shahd sa tha aur asar sam ki tarah
log taslim se taḳhrib tak aa pahunche hain
Dalne nikle hain ik aur hi aalam ki tarah
sa.i-e-iz.har ‘ziya’ kanch ke TuuTe hue lafz
arzuen hain kisi mahfil-e-barham ki tarah
Leave a Reply