Irfan Siddiqi
ishq miyan is aag men mera zahir hi chamka dena
mere badan ki miTTi ko zara kundan-rang bana dena
aao tumhari nazr karen ham ek charagh hikayat ka
jab tak jaago raushan rakhna niind aa.e to bujha dena
biis ikkis baras pichhe hamen kab tak milte rahna hai
dekho, ab ki baar milo to dil ki baat bata dena
siine ke virane men ye ḳhushbu ek karamat hai
varna itna sahal nahin tha raakh men phuul khila dena
dil ki zamin tak raushniyan thin, chehre the, hariyali thi
ab to jahan bhi sahil paana kashti ko Thahra dena
maula, phir mire sahra se bin barse badal lauT ga.e
ḳhair, shikayat koi nahin hai agle baras barsa dena
ḳhvaja ḳhizr suno ham kab se is basti men bhaTakte hain
tum ko agar taklif na ho to jangal tak pahuncha dena
Leave a Reply