mash.al-e-dard ko bhaḌkao ki kuchh raat kaTe
aaj har zaḳhm ko chamkao ki kuchh raat kaTe
phir chale un ki hadis-e-lab-o-ruḳhsar chalo
daar par ham ko chaḌha aao ki kuchh raat kaTe
vo to sab bhar ga.e ab tak jo mile the yaaro
ab koi zaḳhm naya khaao ki kuchh raat kaTe
talḳhi-e-zist ke sannaTe se Dar lagta hai
phir gham-e-yar ko bulvao ki kuchh raat kaTe
ik na ik hadisa har saans ke saath aata hai
meri jaan tum bhi chali aao ki kuchh raat kaTe
sard-o-ḳhamosh hai ab anjuman-e-fan ‘shaghil’
sher-o-ehsas ko sulgao ki kuchh raat kaTe
Leave a Reply