Raees Niyazi
har aa.ine ne kaha ruḳhsat-e-ghubar ke ba.ad
yahan to kuchh bhi nahin hai jamal-e-yar ke ba.ad
zamana zer-e-nagin tha raza-e-yar ke ba.ad
vo iḳhtiyar mila tark-e-iḳhtiyar ke ba.ad
ye manta huun adab shart-e-ishq hai lekin
ye hosh kis ko rahega nigah-e-yar ke ba.ad
paron se munh ko chhupa kar qafas men aa baiTha
chaman ka haal na dekha gaya bahar ke ba.ad
tire jamal ko samjhe tilism ghuncha-o-gul
fareb khaa.e bahut ham ne e’tibar ke ba.ad
vo jaam jaam nahin hasil-e-do-alam hai
jo dast-e-shauq men aaya hai intizar ke ba.ad
gham-e-firaq ki manzil ‘ra.is’ ḳhatm hui
ab aage jalve hi jalve hain hijr-e-yar ke ba.ad
Leave a Reply