Ahmad Ali Barqi Azmi
ye jahan-e-ab-o-gil lagta hai ik maaya mujhe
har-qadam par justuju ne jis ki bahkaya mujhe
zindagi-bhar mere apnon ne diya mujh ko fareb
the jo begane unhon ne aa ke apnaya mujhe
vaada-e-imroz-o-farda men ulajh kar rah gaya
zindagi-bhar sabz-bagh ik aisa dikhlaya mujhe
ik muamma jaise ho sab ke liye mera vajud
har kisi ne apne apne zarf tak paaya mujhe
jis ko dekho gardish-e-halat ka hai vo shikar
har koi jaise nazar aata ho ghabraya mujhe
ahl-e-duniya ne diye hain is qadar mujh ko fareb
karta hai vahshat-zada ab apna hi saaya mujhe
us ki zulf-e-kham-ba-kham se ab nikalna hai muhal
ghamza-o-naz-o-ada se aisa uljhaya mujhe
ab jahan koi nahin mere liye rah-e-farar
mera jazb-e-shauq akhir kis jagah laaya mujhe
jaun to jaun kahan koi nahin hai khizr-e-rah
umr-bhar josh-e-junun ne mere tadpaya mujhe
ab udata hai miri sahra-navardi ka mazaq
ishq karne ke liye tha jis ne uksaya mujhe
kar di sab apni mata-e-zindagi jis par nisar
ye jahan-e-rang-o-bu hargiz na raas aaya mujhe
main samajhta tha jise apna rafiq-e-zindagi
takhta-e-mashq-e-sitam us ne hi banvaya mujhe
tha mira jo hashiya-bardar ‘barqi’-azami
us ne hi tauq-e-ghulami aa ke pahnaya mujhe
Leave a Reply