main jahan ja.un mire saath chale sannaTa
meri ankhon men lagatar jale sannaTa
sub.h aati hai dabe paanv chali jaati hai
gher leta hai mujhe shaam Dhale sannaTa
bhagti bhiiḌ ke qadmon se lipaT kar ro.e
varna har sust musafir ko chhale sannaTa
tum ḳhayalat ke ḳhemon men simaT mat jaana
jab sar-e-rah kabhi haath male sannaTa
phir mire shahr men lauT aa.i hai dahshat-gardi
phir har ik jism ke saa.e men pale sannaTa
ab makanon ki chhaton ka bhi nazara kar lo
gungunata hai sitaron ke tale sannaTa
aj-kal un ke Thikanon men baḌi halchal hai
kaash mere bhi shabistan se Tale sannaTa
Leave a Reply