Alif Aur Be Ke Nam

janan! kya ye ho sakta hai

aaj ki shaam kahin nahin jaaen

shor machane vaale fiite

avazon se bhare tave

sab thodi der ko chup ho jaaen

janan! kya ye ho sakta hai

is pyari mashrub ke paimane bhi na chhalken

jin ke bal-bute pe hamari khush-akhlaqi

aam hui hai

aur na mauzuat ke laave munh se ublen

aise log ki jin ke chehre bahut bade aur dil chhote hain

aaj hamen surat na dikhaen

thodi der ko tanhai ki halki khunki basi rahe

log gharon men aur botal almari hi men saji rahe

ham donon us kamre men hon

jis ki divaron pe hamare sukh ke bandhan

tasviron ki shakl men avezan rahte hain

jis men rakkhe kaath ke ghode

kot ke hathi

sab ham ko takte rahte hain

jis men baithi kanch ki chidiyan

ham ko dekh ke Dar si gai hain

jis men rakkhi kai kitaben

ham se ruuth ke mar si gai hain

ham donon tanha hon

thodi der ko gum-sum se baithen

phir rafta rafta bat-chit ke

chhote chhote phuul khilen

qurbat ki garmi se pashemani ke aansu

diye ki tarah se jal utthen

janan kya ye ho sakta hai

ab bhi mera dil kahta hai

shayad aisa ho sakta hai

Leave a Comment