ye baat munkashif hui charag ke baghair bhi
main DhunD lunga har ḳhushi charag ke baghair bhi
hua tha jis jagah kabhi visal-e-yar dosto
hai us jagah pe raushni charag ke baghair bhi
likkhi ga.i hain jis ke saath zindagi ki manzilen
vo aa milega aadmi charag ke baghair bhi
masarraton ke qafile luTa rahi hai phir mujhe
tiri ye ḳhud-supurdagi charag ke baghair bhi
main tazkira karun to kya karun jamal-e-yar ka
damak rahi thi dilkashi charag ke baghair bhi
tumhari ek yaad be-shumar hasraton ke rang
nigah men saja ga.i charag ke baghair bhi
gila kisi se kyuun karun guzar hi ja.egi ‘ḳhayal’
ye muḳhtasar si zindagi charag ke baghair bhi
Leave a Reply