Poet
gham uThate hain vahi aksar ḳhushi paane ke ba.ad
jo ḳhizan ko bhuul jaate hain bahar aane ke ba.ad
zindagi yuun kaT rahi hai un ke Thukrane ke ba.ad
jaise ik mahfil ki halat sham.a bujh jaane ke ba.ad
ahl-e-kashti tum ko ye har mauj deti hai payam
paoge sahil magar tufan se Takrane ke ba.ad
jo bhi pyasa aa.e us ki pyaas bujhna chahiye
bandishen kaisi dar-e-mai-ḳhana khul jaane ke ba.ad
jaise ham daur-e-jahalat se bhi pichhe haT ga.e
aisi baten kar rahe hain hosh men aane ke ba.ad
hoshiyar ai qafile vaalo ki aksar qafile
luT ga.e hain sarhad-e-manzil pe aa jaane ke ba.ad
ai falak ham bhulte jaate hain andaz-e-ḳhalil
ham pe angare bhi barsa phuul barsane ke ba.ad
saḳht hota hai shu.ur-e-zindagi ka imtihan
inqalab aane se pahle inqalab aane ke ba.ad
inqilab-e-vaqt ke sho.alon men baḌh ke kuud ja
zindagi milti hai parvane ko jal jaane ke ba.ad
haan taḌapne ka bhi ‘sharib’ ik saliqa chahiye
tau sahi duniya na taḌpe ham ko taḌpane ke ba.ad
Leave a Reply